Gen 1 | TVK | STEP | Tetiamu nousav, Hi tepeas ni ut nesao e ut etan.

Genesis 1

Melele xa Hi Tepeas ni Ut Nesao e Ut Etan

Senesis 1:1-2:3

1 Tetiamu nousav, Hi tepeas ni ut nesao e ut etan. 2 E melele nen ak, ut etan teta hon tang, holesok tehe tovuol en. Tas tepol xol ut xil vus, e ut te maluxoluk. E ninin na Hi tete nesao ra tas. 3 E melele nen ak, Hi biteni bit, “!Mae ni miehen vastal!” Ma miehen mistal. 4 Hi pusi xa miehen ak bos, e miling tetasil ni ra maluxoluken. 5 Miehen nen ak, xi miling hisen be 'Melengien'; e maluxoluken, miling hisen be 'Vongien'. Vongien ba, melengien bemei - ngan ak be melengien tei.

6 Di, Hi biteni bit, “!Mae ni mesavuol tova mei ileh pas oei ra tas mei ihe lu!” 7 Ma mistal nggoni ngan taxa biteni. Nggo sexien ak, Hi pol ni mesavuol tei e milingi de hilaep te tas xa de etan e oei xa di nesao e momah xil. 8 E mesavuol nen ak, miling hisen be 'Tilang Hat'. Vongien ba, melengien bemei - ngan ak be melengien lu (2).

9 Di, Hi biteni bit, “Mae ni tas xa di e tan imei e ut tei takes, e tan imei istal ixo en.” Ma mistal nggoni ngan taxa biteni. 10 E tan ak, xi miling hisen be 'Tan', e tas xa bemei ut tei takes, miling hisen be 'Tas'. E Hi pusi xa lubos. 11 Di, xi biteni bit, “Mae ni holesok xil liteh e ut etan: ngan xil xa utute iti en, ngan xil xa koute iti en, e ngan xil xa liso huite xa utute iti en.” Ma mistal nggoni ngan taxa biteni. 12 Misak ni, holesok savsav xil holu lateh e ut etan. E Hi pusi xa labos. 13 Vongien ba, melengien bemei - ngan ak be melengien tol (3).

14 Di, Hi biteni bit, “Mae ni holesok xil xa di minahin listal e tilang hat tengan isak ni melengien isav ni vongien. Lipisen melengien xil e huram xil, e lipisen melele xil mun xa momal tengan holesok xil listal en. 15 Xil ti liminahin e tilang hat e lisak ni ut etan mei imieh e melengien e mei imem e vongien.” Ma mistal nggoni ngan taxa biteni. 16 Hi pol ni laet lu xa mahulong: eai xa nggeih minggan e melengien, e aveti xa te xeih pupu ti mem e vongien. E xi pol ni hitu xil mun xa di laleluv. 17 Xi miling xil e tilang hat tengan lileluv xol ut etan, 18 tei xa minggan e melengien, e tei xa mem e vongien tengan melele xalu ak lalisav. E Hi pusi xa labos. 19 Vongien ba, melengien bemei - ngan ak be melengien hat (4).

20 Di, Hi biteni bit, “Mae ni holesok xil xa lameul lipolu e tas. E mae ni tuman xil lixa xolol tilang hat.” 21 Ma, Hi pol ni meseo xil xa latellep ladi e tas del holesok sav xil mun xa lameul ladi en. Xi pol ni tuman sav xil mun xa di langga. E Hi pusi xa labos. 22 Xi misa tuxolxatien nan mi xil, e biteni mi ngan xil xa ladi e tas bit, “Mupesis mei muhe holu e musak ni tas ipolu ni xamim.” E mi tuman xil xi biteni bit, “Xamim mun, mupesis mei muhe holu e misak ni ut etan ipolu ni xamim.” 23 Vongien ba, melengien bemei - ngan ak be melengien lim (5).

24 Di, Hi biteni bit, “Mae ni holesok xil vus xa lameul, mei listal e liti e tan: ngan xil xa lamah, e ngan xil xa labe vuran; ngan xil xa labe mahulong, e ngan xil xa latereli.” Ma mistal nggoni ngan taxa biteni. 25 Hi pol ni xil vus, e pusi xa labos.

26 Di, Hi biteni bit, “Xosali, ratipol ni moletin tova xa ixoni ratel. E holesok sav xil vus te ut etan liti pe hen: meseo xil e tuman xil; vongoro xil xa lamah e ngan xil xa labe vuran; ngan xil xa labe mahulong, e ngan xil xa latereli.” 27 Misak ni, melele xa Hi pol ni moletin, xi pol ni nggoni xi. Pol ni tei be malohos, e tei mun, be atou. 28 Di, xi misa tuxolxatien nan mi xalu e biteni bit, “Muliling horamue namil xil lihe holu e mulisak ni xil mei lipolu e ut etan. E inou niling holesok xil xa meul e ut etan liti e hemil: meseo xil te tas, tuman xil xa di langga e tilang hat, e holesok sav mun xa ladi e ut etan. 29 ?Mupusi? E ut etan, napol ni holesok savsav xil di lateh: ngan xil xa laling utute, ngan xil xa laling koute, e ngan xil xa laso huite. Xil vus be te anien en. 30 E mi holesok sav xil xa lameul e ut etan, nasa husmunae xil e utiei xil mun tengan ti lia ni. Nasa ni mi vongoro xil te ut etan e tuman xil xa di langga e tilang hat: ngan xil xa labe mahulong e ngan xil xa latereli.” Ma mistal nggoni ngan taxa biteni. 31 Hi pus holesok xil vus xa xi pol ni labos pupu. Vongien ba, melengien bemei - ngan ak be melengien tei he sav (6).